BESTA BAI, BORROKA FEMINISTA ERE BAI !

KOLDO 24 Uzt 2019,
BESTA  BAI,  BORROKA  FEMINISTA  ERE  BAI  !

Erasorik gabeko besta eremuak eraiki nahi baditugu, deus baino lehen, ohartu behar dugu eremu horretan gertatzen den jazarpena ez dela eguneroko genero-desoreken segida baizik.

Uda aitzinatzen ari da eta bakantzez gozatzen ariko gara batzuk; bertzeak, berriz, lanera bidean, errepideak betetzen dituzten udatiarrez kexu. Nolanahi ere, batek baino gehiagok, gorriz markatuak izanen ditu uztailaren 24tik 28ra bitarteko egunak: Baionako bestak. Lau egunez, Euskal Herriko zein bertze hamaika bazterretako bestazaleak bilduko dira hiriko karriketan. Lau egunez, lagunekin elkartuko gara mahaiaren inguruan; akitu arte eginen dugu dantza Patxa plazako kontzertuekin; aspaldi ikusi gabeko jendea gurutzatuko dugu Baiona Ttipiko karriketan… Azken batean, lau egun horietan, erritmo desberdin batean biziko gara, bestaren erritmora.

Edozein gisaz, erritmo aldaketa horrek ez du erran nahi jendartean egunerokoan ikusten ditugun arazoak bat-batean desagertzen direnik. Ezta gutiago ere. Testuingurua desberdina izanik ere, urteko bertze 360 egunetan ematen diren zapalkuntzak errepikatu baizik ez dira egiten. Hori bera gertatzen da, bertzeak bertze, eraso sexistekin. Gizonen neurrira eginiko sistemak argi eta garbi zapaltzen gaitu egunerokotasunean (lan-eremuan, zaintza-gaietan, hezkuntzan) eta emazteon aurkako bortizkeria kasuak normaltasun kezkagarriz bizi ditugu. Hala, zapalkuntza-egoera hori besta-giroan ere sendi da. Baita Baionako bestetan ere. Hori dela eta, erasorik gabeko besta eremuak eraiki nahi baditugu, deus baino lehen, ohartu behar dugu eremu horretan gertatzen den jazarpena ez dela eguneroko genero-desoreken segida baizik.

Nolabait, emazteok egunero eta sistematikoki pairatzen dugun bortizkeria itxuraldatu egiten da bestetan, drogek eta alkoholak eragin deshinibizioa konplize. Usu, gainera, aski era sotilean agertzen da. Izan ere, egun, nehor gutik ukatuko du emazte bat sexu harremanak izatera behartzea bortxaketa eta beraz, eraso sexista denik. Alta, erran bezala, bortizkeria ustezko umorearekin, alkoholarekin eta bestarekin nahasten delarik, erasotuarekiko atxikimendua eta erasotzailearekiko mespretxua ez dira beti hain argiak, irmoak izaten. Are gutiago, erasotzailea laguna, lankidea edo bizilaguna dugularik. Haatik, ostatuan dantzan ari garelarik ebatsi musua edo goizeko lauetako txiste matxistak ere erasoak dira. Eta ez da horiek justifikatuko dituen besta-girorik.

Horregatik, uztaila bukaeran aldarrikapen eta borrokarako eremu izan behar du Baionak, bestarakoa bezainbertze. Eraso sotilenen kontra ere jarrera irmoa izan behar dugu eta bertzetik, erasotuei entzun, haien hitza zalantzan ezarriz bigarren aldiz erasotzen baitugu. Gisa horretan, borroka feministaren bidetik, Baionako besta aske eta parekideak eraikiko ditugu.

 

Aitzinako talde feminista, Armelle Etchenique, Leire Errandonea